Ika-28 Linggo sa Karaniwang Panahon
11 Oktubre 2026
Unang Pagbasa: Isaias 25, 6-10a
Salmong Tugunan: Salmo 22, 1-3a. 3b-4. 5, 6
Ikalawang Pagbasa: Filipos 4, 12-14. 19-20
Mabuting Balita: Mateo 22, 1-14
Pagninilay
Ni: Renato C. Vibiesca
Sa susunod na buwan ay dadalo kami ng aking misis sa isang kasalan sa Baguio upang maging isa sa mga ninong at ninang. Enero pa lang ay naimbitahan na kami kaya’t halos sampung buwan na kaming naghahanda para sa kasalang ito. Ang ilan sa pinaghahandaan namin ay ang pansamantalang tutuluyan namin, ang budget na gagatusin para sa transportasyon, ang aming tutuluyan at destinasyon sa pamamasyal pagkatapos ng piging. Mabusisi rin ang paghahanda namin sa mga isusuot tulad ng kulay ng aming damit na kailangang akma sa ibinigay na tema ng ikakasal. Inaasahan din naming mas malamig na rin ang klima sa Baguio dahil sa paglakas ng hanging amihan kaya’t kasama rin ito sa paghahanda ng iba pang kasuotan. Tulad sa talinghaga ng ating Panginoong Hesus, kung tayo ay tumugon sa paanyaya ng hari, marapat lamang na paghandaan ito nang mabuti upang maging angkop ang kasuotan sa piging ng kasal. Sa pakahulugan ng ating simbahan, ang piging ay paanyaya sa kaligtasan sa lahat, walang pinipili ang ating Panginoon sa mga iimbitahan dahil nga ang kasal ay larawan ng Kaharian ng Diyos. Siguradong maraming imbitadong mga banal at kahangan-hanga ang buhay ng mga taong pinili mismo ng Diyos upang makasalo sa piging at mayroon ding mga kilala o mga sikat na personalidad na inanyayahan. Subalit hindi naman lahat ay tumutugon sa paanyaya dahil siguro’y nasilaw na sa kaharian ng mundo ang karamihan at marahil ay nagbibingi-bingihan na lamang sa pagtawag sa kanila. Sa walang-hanggang kabutihan at awa ng Diyos ay kahit paulit-ulit pa tayong tumanggi ay hindi Siya nagsasawa na paulit-ulit din tayong iniimbitahan sa Kanyang Kaharian.
Ang nakapagtataka talaga ay kahit pa tayong mga walang pangalan sa lipunan o mga makasalanang tunay na lagi na lamang nadadapa sa kasalanan sa mundo ay patuloy ding iniimbitahan ng Panginoon sa Kanyang Kaharian. Kaya nga dapat na ipagpasalamat talaga na tayong lahat ay iniimbita ng Diyos sa Kanyang Kaharian sa langit kahit pa hindi naman tayo karapat-dapat. Ang paghahanda ng ating pananamit naman sa pagdalo sa kasalan ay ang ating pagsisikap na maging mabuting Kristiyano. Ang isa sa paghahanda sa piging ay ang malimit na pagtanggap natin ng mga sakramento ng ating simbahan. Tila magarbong damit na akma sa kasalan ang pagsasabuhay ng mga sakramento para sa mga grasyang dulot ng pakikipagkaisa kay Hesus. Tulad ng sakramento ng pangungumpisal na nagpapalinis ng ating kaluluwa at nagpapaputi ng ating kasuotan para sa dadaluhang piging. Higit na magpapakinang sa ating kalooban ang malimit na pagtanggap sa ating Panginoong Hesus sa sakramento ng Eukaristiya sa banal na Misa. Hindi ba’t napakalaking biyaya ng ating Panginoong Hesus para sa ating lahat na Siya na nga mismo ang nagbigay sa atin ng mga biyaya ng kabanalan para sa paghahanda sa piging sa pamamagitan ng mga iniwan Niyang Sakramento? Ang simula ng hamon sa atin bago pa nga ang paghahanda ng lahat ng kasuotan ay ang pagtugon sa Kanyang paanyaya. Kung naging pusong bato na tayo, nalunod na sa kasakiman ng kayamanan sa mundo, nabaliw na sa pagyakap sa kasalanan, at napagkakamalan nating hindi na tayo makakaahon pa sa putikan, lagi lang nating isipin na ang paanyaya ng Diyos sa atin ay walang hanggang awa at pagpapatawad. Kung parang ang lahat ay madilim na sa ating buhay, kung halos iniwan na tayo ng lahat at wala na tayong malapitan, kung nasadlak na tayo sa mapapait na karanasan at kabiguan, ang pagmamahal ng Diyos sa atin ay nananatili, kailanma’y hinding-hindi tayo bibiguin ng ating Panginoon. Muli nating tugunan ang patuloy na pag-anyaya sa piging ng Kanyang Kaharian at doon sa banal na pagsasalo ay yakapin natin nang mahigpit ang ating mapagmahal na Diyos. Amen.
Panalangin
Panginoong Hesus, pasasalamat at papuri ang aming dalangin para sa walang hanggang pagmamahal mo sa amin dahil sa patuloy na pag-anyaya sa amin sa iyong Kaharian kahit pa hindi kami naging karapat-dapat. Kami po ay mapagpakumbabang tumutugon sa Inyong paanyaya at pahintulutang kaming makapaghanda para sa pakikipagkaisa sa aming Panginoong Hesus. Amen
