Ika-29 na Linggo sa Karaniwang Panahon
18 Oktubre 2026
Unang Pagbasa: Isaias 45, 1. 4-6
Salmong Tugunan: Salmo 95, 1 at 3, 4-5. 7-8. 9-10a at k
Ikalawang Pagbasa: 1 Tesalonica 1, 1-5b
Mabuting Balita: Mateo 22, 15-21
Pagninilay
Ni: Renato C. Vibiesca
Ipinapakita sa Ebanghelyo ngayon na napakatalino ng Diyos na ating Panginoong Hesus dahil gusto ng mga Pariseo na siluin Siya, ngunit hindi sila nagtagumpay. Ang gusto nila’y bigyang katuwiran ang pagbibigay ng buwis kay Cesar na kung ang sagot ni Hesus ay hindi dapat magbuwis, pararatangan siyang rebelde sa pamahalaan ng imperyong Romano; at kung ang sagot nama’y dapat na magbuwis, ipinapahayag Niya ang pagsang-ayon sa korapsiyon ng pamahalaan at patunay na hindi siya pumapanig sa mamamayang naghihirap na nasusuklam sa sistema ng sapilitang pagbubuwis sa awtoridad na may titulong Cesar. Sa tingin ng mga tusong Pariseo ay mahuhuli na Siya sa kanilang tanong dahil kahit ano ang isagot Niya ay walang kawala sa bitag. Gusto nilang talian ng lubid sa leeg si Hesus upang matigil na sa Kanyang magagandang gawain at gusto nilang parang aso na susunod lamang sa kanilang mga utos. Marahil ay inggit na inggit na sila sa patuloy na pagsikat ni Hesus dahil sa husay ng kanyang pangangaral na kadalasang taliwas sa kanilang itinuturo. Marami ding humahanga kay Hesus sa tunay at sinserong paggawa ng mabubuting bagay para sa mamamayan, samantalang, mga taong mapagkunwari ang mga Pariseo dahil sa pakitang-tao lamang ang kanilang pananampalataya.
Tulad ng mga Pariseo, nasasadlak din tayo sa pagkakataon na maging tuso at mapagkunwari sa ating kapwa. Kung tayo’y mapagmataas sa kapwa, kasunod nito’y inggit; kung tayo’y naiinggit sa posisyon at nauunahan ng iba sa itaas, gusto nati’y hilahin sila pababa; kung tayo nama’y nahihigitan sa kasaganaan at kasikatan, gusto nati’y angkinin ang kanilang natamo. Lalong malakas ang tukso ng inggit at pagmamataas kung tayo’y nasa posisyong tagapamahala tulad ng mga nasa politiko at negosyo. Kaya nga napakahirap mamuhay sa gitna ng mga tuso sa pamahalaan at naliligid ng mga mapanglamang na may-ari ng malalaking negosyo. Subalit, hindi naman tayo hahayaan ng ating Panginoong Hesus na mahulog sa bitag ng mga kaaway sa lipunan at kung mananatili tayong tapat sa Diyos, higit Niyang ibinibigay sa atin ang biyaya upang hindi masilo sa anumang masasamang balak sa atin. Ang sagot? Laging maging tapat sa pagibibigay ng nauukol para sa Diyos tulad ng pagsisimba tuwing Linggo o higit pang mga araw, tapat na pangungumpisal at pananatiling masigasig sa pagtupad ng lahat ng Sakramento ng ating simbahan.
Noong isang Linggo, habang papunta kami ng buong pamilya ko sa simbahan, nakasakay kami sa isang napakagarang kotse ng Grab na aming na-book at namangha kami sa kakaibang kwento ng drayber nito. Buong buhay niya raw ay ginugol sa negosyo at pagtatrabaho kaya ngayo’y retirado na’t nagtagumpay na sa buhay, kaya naglilibang na lang siya sa pagmamaneho. Nalibot na nga raw niya ang buong mundo at naiinip na lang sa bahay kaya nagpasyang maging drayber ng Grab. Kaya lang ay hindi naman daw siya nagsisimba at ni minsa’y hindi niya naisama sa pagsisimba ang kanyang mga anak at asawa dahil lahat nga sila ay abala sa pagtataguyod ng negosyo. Sayang naman ang sabi ko, sayang nga raw talaga kasi’y huli na ngayon dahil hiwa-hiwalay na sila ng tirahan ng kanyang pamilya. Nasilip ko sa salamin ang lungkot ng kayang mga mata nang sabihin ang panghihinayang.
Ang hamon ng ating buhay ay hindi lamang tungkol sa pag-aasikaso ng buwis o anumang negosyo o ganansiya sa kaperahan sa mundo, bagkus ay ipinapakita sa atin ni Hesus ang mabuting halimbawa na ang higit na kailangan nati’y ang pagbibigay ng ating oras at buhay na naayon para sa Diyos. Sapagkat ang tunay na layunin ng ating buhay ay ang makilala nang husto ang Diyos at mahalin nang tunay upang maialay natin ang ating buhay hanggang sa makapiling Siya habambuhay. Hindi naman bulag ang Diyos para hindi makita ang mga ninanakaw na buwis sa atin ng mga tusong nagsasamantala. Nag-uumapaw naman ang kagustuhan ng Diyos na tayo’y pasaganahin din sa ating buhay upang sundin ang kalooban Niya na maglaan tayo ng oras para sa Kanya. Ang totoo’y higit pa sa katalinuhan ang ipinamalas ni Hesus sa pagsagot sa Pariseo dahil ito’y tunay na karunungang mula sa Kanyang pagka-Diyos at kahit sino pang may pinakamataas na katungkulan o pinakamatalinong tao na tuso ay hinding-hindi uubra sa karunungan ng ating Diyos. Amen.
Panalangin
Panginoong Hesus, higit ang Iyong katalinuhan at walang hanggang karunungan na amin ding kahilingan na kahit mambunan man lang, upang mapagtagumpayan namin ang anumang hamon ng pagsilo ng mga tuso at maging grasya ito ng pagbabalik namin ng aming buhay na nararapat para sa Iyo. Amen.
